الجيش كان لازم يقدم اللحوم في المنافذ الخاصة بيه بأسعار أرخص من السوق علشان يمتص غضب الناس من الغلاء، فتجاهلنا كمربين للمواشي لان أسعار البيع عندنا أصبحت مرتفعة بسبب ارتفاع أسعار الأعلاف، واتجه الجيش لاستيراد مواشي حية، ولحوم مجمدة، بأسعار أقل من المتاح عندنا و في المزارع. سنة 2017 حركة البيع كانت أقل من السنين اللي قبلها، بسبب الغلاء اللي عم كل شيء، لكن سنة 2018 كانت سنة تكسير عظام من الجيش ضدنا، الجيش بيبيع في المنافذ بتاعته بأسعار أرخص من متوسط الأسعار السوق، وبيزود المنافذ بتاعته في كل حتة، مستفيدين بنفوذهم مابيدفعوش جمارك ولا ضرائب، ومصاريفهم مش زي التجار، ولا بيدفعوا مرافق، ولا عندهم تكلفة نقل، ولا عمالة لانهم بيشغلوا الولاد المجندين، بيبيعوا بأسعار رخيصة ويقدروا يكسب كمان، واحنا مش عارفين نلاقيها من اسعار الأعلاف، ولا من منافسة الجيش.. معدش مربي المواشي عارف يعيش، الأول كان معظم الموظفين بيحوشوا قرشين ويشغلوهم في تربية المواشي عند الفلاحين، لكن دلوقتي الدخل من التربية أصبح قليل، وبدأت الناس تتخلص من المواشي اللي عندها، وتاخد فلوسها تشغلها في حاجات تانية بتكسب أكتر، وماعدش حد بيربي إلا اللي عنده أرض أو التجار الكبار وأصحاب المزارع